Á Háafelli í Hvítársíðu hafa verið ræktaðar geitur síðan 1989. Hjónin Jóhanna B. Þorvaldsdóttir og Þorbjörn Oddsson bjuggu fyrst með blandað bú til ársins 2005 þegar geitur voru orðnar meginbústofn bæjarins.

Áhersla hefur verið lögð á þróun og markaðssetningu geitfjárafurða og nýtingu alls hráefnis. Íslenski geitfjárstofninn hefur verið í útrýmingarhættu í mörg ár og þarfnast verndunar og viðhalds en í ræktun hefur áherslan verið á að minnka skyldleika og halda í fjölbreytni. Hollusta og gæði geitfjárafurða er mikil og áhugi almennings aukist mikið. Árið 2012 var Geitfjársetur opnað en tekið er á móti gestum sem vilja komast í návígi við geitur, læra um þær og kynnast afurðum þeirra.